ചെന്നൈ: പതിനഞ്ചുകാരിയെ മദ്യംനല്കി ലൈംഗികപീഡനത്തിനിരയാക്കിയ സംഭവത്തില് യുവാവ് അറസ്റ്റില്. വ്യാസര്പാടി സ്വദേശിയായ മണികണ്ഠന് (26) ആണ് അറസ്റ്റിലായത്. പോക്സോ നിയമപ്രപകാരമാണ് ഇന്നലെ ഇയാളെ എംകെബി നഗര് വനിതാ പൊലീസ് അറസ്റ്റ് ചെയ്തത്. കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
വ്യാസര്പാടിയിലെ മുത്തശ്ശിയുടെ വീട്ടിലായിരുന്നു പെണ്കുട്ടി താമസിച്ചിരുന്നത്. വെള്ളിയാഴ്ച വൈകിട്ട് പെണ്കുട്ടിയെ വീട്ടില് ബോധരഹിതയായി കാണപ്പെട്ടിരുന്നു. ഇതിന് പിന്നാലെ കുട്ടിയെ ആശുപത്രിയില് പ്രവേശിപ്പിച്ചു. വൈദ്യപരിശോധനയില് കുട്ടി മദ്യപിച്ചതായി കണ്ടെത്തി. തുടര്ന്ന് പെണ്കുട്ടിയോട് വിവരം തിരക്കിയതോടെയാണ് സമീപവാസിയായ യുവാവ് മദ്യം നല്കി ബോധരഹിതയാക്കിയ ശേഷം ലൈംഗികമായി പീഡിപ്പിച്ച വിവരം വെളിപ്പെടുത്തിയത്.
ഇതോടെ ആശുപത്രി അധികൃതര് വിവരം പൊലീസിനെ അറിയിക്കുകയായിരുന്നു. ചോദ്യം ചെയ്യലിനിടെ പെണ്കുട്ടിയുമായി കഴിഞ്ഞ ഒന്നര വര്ഷമായി സൗഹൃദത്തിലായിരുന്നുവെന്നാണ് യുവാവ് പൊലീസിനോട് പറഞ്ഞത്. പെണ്കുട്ടിയെ വീട്ടിലേക്ക് കൊണ്ടുപോയി മദ്യം നല്കി ലൈംഗികമായി പീഡിപ്പിച്ചു എന്നും യുവാവ് മൊഴി നല്കിയിട്ടുണ്ട്. കോടതിയില് ഹാജരാക്കിയ ഇയാളെ റിമാന്ഡ് ചെയ്തു.