കാസര്കോട്: കാസര്കോട് നീലേശ്വരം അഞ്ഞൂറ്റമ്ബലം വീരര്കാവ് തെയ്യം കെട്ട് മഹോത്സവത്തിനിടെ വെടിപ്പുരയ്ക്ക് തീപിടിച്ച് അപകടം. 154 പേര്ക്ക് പരിക്ക്. അപകടത്തില് പരിക്കേറ്റ് 97 പേരാണ് ചികിത്സയിലുള്ളത്. ഇതില് ഒരാളുടെ നില ഗുരുതരമാണ്. 80 ശതമാനം പൊള്ളലേറ്റ ഇദ്ദേഹത്തെ കണ്ണൂര് പരിയാരം മെഡിക്കല് കോളേജിലേക്ക് മാറ്റി.
ഗുരുതരമായി പരിക്കേറ്റ മറ്റു മൂന്നുപേരെ കൂടി പരിയാരത്തേക്ക് മാറ്റിയിട്ടുണ്ട്. തെയ്യം കെട്ട് മഹോത്സവത്തിനിടെ പടക്കം പൊട്ടിച്ചതിന്റെ തീപ്പൊരി, പടക്കങ്ങള് സൂക്ഷിച്ചിരുന്ന സ്ഥലത്ത് വീണതാണ് അപകട കാരണമെന്നാണ് പ്രാഥമിക നിഗമനം. മാല പടക്കം പൊട്ടിച്ചപ്പോള് ഇതില് നിന്നുള്ള തീപ്പൊരി പടക്കങ്ങള് സൂക്ഷിച്ച സ്ഥലത്തേക്ക് തെറിച്ച് വലിയ രീതിയിലുള്ള പൊട്ടിത്തെറിയുണ്ടാകുകയായിരുന്നു.
അപകടം നടന്നസ്ഥലത്ത് നൂറുകണക്കിന് ആളുകളാണ് ഉണ്ടായിരുന്നത്. പൊള്ളലേറ്റതിന് പുറമെ തിക്കിലും തിരക്കിലും പെട്ടും നിരവധി പേര്ക്ക് പരിക്കേറ്റു. പടക്കങ്ങള് സൂക്ഷിച്ചത് അനുമതിയില്ലാതെയാണെന്ന് കാസര്കോട് ജില്ലാ കളക്ടര് ഇമ്ബശേഖര് പറഞ്ഞു. മിനിമം അകലം പാലിക്കാതെയാണ് പടക്കം പൊട്ടിച്ചത്. 100 മീറ്റര് വേണമെന്നാണ് നിയമം.
രണ്ടോ മൂന്നോ അടി അകലെ വച്ച് പടക്കം പൊട്ടിച്ചു. സംഭവത്തില് പൊലീസ് കേസെടുത്ത് അന്വേഷണം തുടങ്ങിയിട്ടുണ്ട്. വെടിക്കെട്ട് നടത്തുന്നതിന്റെ സമീപത്ത് തന്നെ പടക്കങ്ങള് സൂക്ഷിച്ചതാണ് അപകടകാരണം. സ്ഥലത്ത് നിന്ന് സാമ്ബിളുകള് ശേഖരിച്ചുവെന്നും ജില്ലാകളക്ടര് പറഞ്ഞു. അര്ധരാത്രി 12 മണിയോടെയാണ് സംഭവം.
മൂവാളംകുഴി ചാമുണ്ഡി തെയ്യത്തിന്റെ കുളിച്ച് തോറ്റം ചടങ്ങിനിടെയാണ് അപകടം ഉണ്ടായത്. പരിക്കേറ്റവരെ ആദ്യം നീലേശ്വരം, കാഞ്ഞങ്ങാട് എന്നിവിടങ്ങളിലെ വിവിധ സ്വകാര്യ ആശുപത്രികളിലും കാഞ്ഞങ്ങാട് ജില്ലാ ആശുപത്രിയിലും പ്രവേശിപ്പിക്കുകയായിരുന്നു. സ്ത്രീകളും കുട്ടികളും ഉള്പ്പെടെയുള്ളവര്ക്കാണ് പരിക്കേറ്റത്. ഗുരുതരമായ നിരവധി പേരെ മംഗലാപുരത്തെ സ്വകാര്യ ആശുപതികളിലേക്ക് മാറ്റിയിട്ടുണ്ട്. 1500ലധികം പേര് തെയ്യംകെട്ട് മഹോത്സവത്തിന് എത്തിയിരുന്നു.