വിദ്യാഭ്യാസ സ്ഥാപനങ്ങളിലെ അടിസ്ഥാന സൗകര്യങ്ങള്‍ മെച്ചപ്പെടുത്തുന്നതിനും വിദ്യാര്‍ഥികള്‍ക്ക് മികച്ച പഠനസൗകര്യങ്ങള്‍ ഉറപ്പാക്കുന്നതിനുമായി കാഞ്ഞങ്ങാട് ബ്ലോക്ക് പഞ്ചായത്ത് നടപ്പാക്കുന്ന വികസന പദ്ധതികളുടെ ഭാഗമായി പുല്ലൂര്‍ ഐ.ടി.ഐക്ക് രണ്ട് കമ്പ്യൂട്ടറുകള്‍ കൈമാറി. ബ്ലോക്ക് പഞ്ചായത്തിന്റെ 2026-27 വാര്‍ഷിക പദ്ധതിയില്‍ ഉള്‍പ്പെടുത്തിയാണ് കമ്പ്യൂട്ടറുകള്‍ വാങ്ങി നല്‍കിയത്.
പദ്ധതിയുടെ ഭാഗമായി വാങ്ങിയ രണ്ട് കമ്പ്യൂട്ടറുകള്‍ ബ്ലോക്ക് പഞ്ചായത്ത് പ്രസിഡന്റ് കെ.സുജാതയില്‍നിന്ന് പുല്ലൂര്‍ ഐ.ടി.ഐ പ്രിന്‍സിപ്പല്‍ ഹെയ്സല്‍ കെ.ജെ ബിന്ദു ഏറ്റുവാങ്ങി. സാങ്കേതികവിദ്യാധിഷ്ഠിത പഠനത്തിന് കൂടുതല്‍ അവസരങ്ങള്‍ ഒരുക്കുന്നതിനും വിദ്യാര്‍ഥികളുടെ പ്രായോഗിക പരിജ്ഞാനം വര്‍ധിപ്പിക്കുന്നതിനും പുതിയ കമ്പ്യൂട്ടറുകള്‍ സഹായകമാകും. വിവരസാങ്കേതികവിദ്യയ്ക്ക് തൊഴില്‍മേഖലയില്‍ പ്രാധാന്യം വര്‍ധിച്ചുവരുന്ന സാഹചര്യത്തില്‍, സാങ്കേതിക വിദ്യാഭ്യാസ സ്ഥാപനങ്ങളില്‍ ആധുനിക പഠനസൗകര്യങ്ങള്‍ ഉറപ്പാക്കുന്നത് വിദ്യാര്‍ഥികള്‍ക്ക് പുതിയ സാങ്കേതികവിദ്യകള്‍ പരിചയപ്പെടുന്നതിനും തൊഴില്‍നൈപുണ്യം മെച്ചപ്പെടുത്തുന്നതിനും പ്രയോജനപ്പെടും.
വിദ്യാഭ്യാസ മേഖലയിലെ അടിസ്ഥാന സൗകര്യ വികസനത്തിന് പ്രാധാന്യം നല്‍കുന്ന കാഞ്ഞങ്ങാട് ബ്ലോക്ക് പഞ്ചായത്തിന്റെ ഇടപെടല്‍ പ്രാദേശിക വിദ്യാഭ്യാസ സ്ഥാപനങ്ങളുടെ പുരോഗതിക്ക് കരുത്തേകുന്നതാണ്. വാര്‍ഷിക പദ്ധതികളിലൂടെ വിദ്യാഭ്യാസ സ്ഥാപനങ്ങളുടെ ആവശ്യങ്ങള്‍ പരിഗണിച്ച് പഠനസൗകര്യങ്ങള്‍ മെച്ചപ്പെടുത്തുന്നത് വിദ്യാര്‍ഥികള്‍ക്ക് മെച്ചപ്പെട്ട പഠനാന്തരീക്ഷം ഒരുക്കുന്നതിനും സാങ്കേതിക വിദ്യാഭ്യാസത്തിന്റെ സാധ്യതകള്‍ ഫലപ്രദമായി പ്രയോജനപ്പെടുത്തുന്നതിനും സഹായിക്കും.
ചടങ്ങില്‍ ബ്ലോക്ക് പഞ്ചായത്ത് സെക്രട്ടറി കെ.സി രജിത അധ്യക്ഷത വഹിച്ചു. വികസന സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ പി.കെ മഞ്ജിഷ, ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ പി.എച്ച് ഹനീഫ്, ആരോഗ്യ-വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്സണ്‍ പി.കെ ജയശ്രീ, ബ്ലോക്ക് പഞ്ചായത്ത് അംഗങ്ങളായ ബിന്ദു സുദന്‍, സിന്ധു പത്മനാഭന്‍, ഹനീഫ കുന്നില്‍ എന്നിവര്‍ പങ്കെടുത്തു.