പലതരം ആപ്പുകള്‍ മുഖേന വ്യക്തികളുടെ വിവരങ്ങള്‍ ചോര്‍ത്താന്‍ ഹാക്കര്‍മാര്‍ ശ്രമിക്കാറുണ്ട്. എന്നാല്‍, ഇതുവരെ സമൂഹമാധ്യമങ്ങക്കുള്ളിലേക്ക്് കടന്ന് ദീര്‍ഘനേരം വ്യക്തിവിവരങ്ങള്‍ ചോര്‍ത്തുവാന്‍ അവര്‍ക്ക് കഴിഞ്ഞിട്ടില്ല. പക്ഷെ, വിശ്വാസങ്ങളെയൊക്കെ പഴങ്കഥകളാക്കി അവര്‍ വാട്‌സ് ആപ്പില്‍ നുഴഞ്ഞിരിക്കുകയാണെന്നാണ് റിപ്പോര്‍ട്ടുകള്‍. വലിയൊരു സംഖ്യ തന്നെയുള്ള വാട്‌സ് ആപ്പ് ഉപഭോക്താക്കള്‍ ഇപ്പോള്‍ ഞെട്ടലിലാണ്.

വാട്സ് ആപ്പ് ഉപയോക്താക്കള്‍ക്ക് ഫേസ്ബുക്കാണ് ഈ നിര്‍ണായക സുരക്ഷാ മുന്നറിയിപ്പ് നല്‍കിയിരിക്കുന്നത്. ഫേസ്ബുക്കിന് പുറമെ, ഹാക്കര്‍മാരുടെ കെണിയെ കുറിച്ച് ജാഗ്രതാ നിര്‍ദേശം നല്‍കാന്‍ ഇന്ത്യന്‍ കമ്ബ്യൂട്ടര്‍ എമര്‍ജന്‍സി റെസ്പോണ്‍സ് ടീമും (സി.ഇ.ആര്‍.ടി-ഇന്‍) മുന്നോട്ടു വന്നിട്ടുണ്ട്. ഏറ്റവും പുതിയ വാട്‌സ് ആപ്പ് പതിപ്പിലേക്ക് ഉടന്‍ അപ്ഡേറ്റ് ചെയ്യുന്നത് നല്ലതെന്നാണ് സി.ഇ.ആര്‍.ടി-ഇന്‍ ഉപഭോക്താക്കള്‍ക്ക് നല്‍കുന്ന ഉപദേശം.

വൈറസ് അടങ്ങിയ വീഡിയോ ഫയല്‍ വഴിയാണ് വാട്‌സ് ആപ്പില്‍ ഹാക്കര്‍മാരുടെ കെണി ഒരുക്കപ്പെട്ടിരിക്കുന്നത്. ഈ ഫയലുകള്‍ ഡൗണ്‍ലോഡ് ചെയ്യുക വഴി ആരുടെയും ഫോണില്‍ നുഴഞ്ഞുകയറാന്‍ ഹാക്കര്‍മാര്‍ക്ക് കഴിയുമെന്നതിനാലാണ് ഈ സുരക്ഷാ മുന്നറിയിപ്പ്.

പ്രത്യേകം രൂപകല്‍പ്പന ചെയ്ത വൈറസ് അടങ്ങിയ വീഡിയോ ഫയല്‍ നിശ്ചിത ഉപഭോക്താക്കളുടെ വാട്‌സ് ആപ്പ് അക്കൗണ്ടിലേക്കാണ് അയക്കപ്പെടുന്നത്. എം.പി 4 വീഡിയോ ഫോര്മാറ്റിലായാണ് ഫയല്‍ ഉപഭോക്താക്കള്‍ക്ക് ലഭിക്കുക. ഉപഭോക്താവിന് പരിചയമില്ലാത്ത നമ്ബറില്‍ നിന്നായിരിക്കും ഇത് ലഭിക്കുന്നത്.

വാട്‌സ് ആപ്പ് ഉടനെ തന്നെ അപ്‌ഡേറ്റ് ചെയ്യുക എന്നതാണ് ഹാക്കര്‍മാരെ ചെറുക്കാന്‍ ആദ്യം ചെയ്യേണ്ടത്. ആന്‍ഡ്രോയ്ഡ് ഉപയോക്താക്കള്‍ കുറഞ്ഞ പക്ഷം വാട്‌സ്ആപ്പിന്റെ 2.19.274 പതിപ്പിലേക്കും ആപ്പിള്‍ ഐഫോണ്‍ ഉപയോക്താക്കളാണെങ്കില്‍ കുറഞ്ഞത് 2.19.100 പതിപ്പിലേക്കും അപ്ഗ്രേഡുചെയ്താല്‍ സുരക്ഷിതരാകാന്‍ കഴിഞ്ഞേക്കാം.